MC張天賦呻嗌外賣平台苦等40分鐘 冇外賣員取消不果:一定台灣送嚟
MC張天賦呻嗌外賣平台苦等40分鐘 冇外賣員取消不果:一定台灣送嚟 歌手張天賦(MC)跟外賣平台未知是否八字不太夾,繼上次拒以信用卡找數而嬲到一肚火之後,昨晚MC一連發五個IG Story分享他叫外賣的苦等經歷。他一本正經在疑似家中拍片,他說:「今日拍呢條片係有啲唔開心嘅事情想同大家分享一下。話說啱啱8點10分,心血來潮忽然想食快餐,其實係我預計咗最後一個晚餐,食完呢個Treat Meal放肆餐之後就開始修身,飲食方面控制一下。」 MC選了自己最愛的餐單,一直等更新,沒想到外賣平台稱找不到送遞員,相隔差不多40分鐘仍然未有反應;MC一心打算取消訂單,但卻沒辦法。 「話唔定呢個係上天安排,想我減肥,我就打算取消啦,聯絡客服取消訂單,發現原來唔得,點知佢話客服話暫時關閉。」 MC搞笑「暗寸」外賣平台,「佢有個好好機制,如果唔能夠按時送遞係會有一個賠償,我8點鐘叫但set呢個時間係10點先至到呢個時間,過呢個時間有25蚊coupon畀我,其實我嗌個快餐都係想快,你set 10點…唔緊要啦,起碼佢哋都有誠意嘅!你哋搵唔到速遞員唔緊要,不如我自己去買囉,但你都畀我取消吖係咪?」 MC認為作為消費者,外賣平台外賣員不足,不應該因餐廳已接受訂單為由而不能夠取消訂單,「呢個唔係我責任,我嗌個快餐但你個承諾竟然係兩個鐘之後,咁即係點啫?又唔畀我取消,即係我要等兩個鐘頭,食一個餐廳兩個鐘頭前已準備咗嘅餐,中間有漏洞或者我覺得Policy可以做得好啲囉!我會等到10點,希望可以食到啦!」 隨後,MC更Cap下Google資料,笑指從台灣飛香港都只是大約1.5小時,比他的快餐可能還要快,「我知啦!一定係由台灣送嚟,好期待呀!送唔切就比(畀)25蚊我再叫過!好開心!P.S.個餐叫咗105蚊」。其實去年MC都有上網分享外賣平台的不愉快經歷,由於他拒絕以信用卡找數,於是到網上投訴,最終兩大外賣平台都爭住向他極力推薦,非常搞笑。